मुंबई, 3 Oct 2024– बृहन्मुंबई महानगरपालिकेच्या (BMC) पाणीपुरवठा प्रकल्प विभागाच्या अंतर्गत, हिंदुहृदयसम्राट बाळासाहेब ठाकरे मध्य वैतरणा धरणावर तरंगता सौरऊर्जा आणि जलविद्युत निर्मिती प्रकल्प साकारला जाणार आहे. या संकरित ऊर्जा प्रकल्पामुळे एकूण २६.५ मेगावॅट वीज निर्मिती होणार असून, आगामी अडीच वर्षांत प्रकल्प सुरू होण्याची अपेक्षा आहे. यामुळे BMC ला वार्षिक अंदाजे ९ कोटी रुपयांची बचत होईल.
मध्य वैतरणा धरण हे मुंबईला दररोज ४५५ दशलक्ष लिटर पाण्याचा पुरवठा करते, ज्यामध्ये मुंबईच्या पाणीपुरवठ्यात ११ टक्के वाटा आहे. धरणाच्या साठवण क्षमतेचे प्रमाण १,९३,५३० दशलक्ष लिटर आहे. या प्रकल्पासाठी वैतरणा सोलार हायड्रो पॉवर जेनको कंपनीसोबत करार करण्यात आला असून, ४.७५ रुपये प्रति युनिट दराने वीज खरेदी केली जाणार आहे. ही वीज महाराष्ट्र राज्य वीज पारेषण कंपनीमार्फत राज्याच्या ग्रीडमध्ये जोडली जाईल.
या प्रकल्पाच्या जलविद्युत भागातून १० मेगावॅट क्षमतेचे दोन जनरेटर लावून २० मेगावॅट वीज निर्मिती होईल. प्रकल्पाच्या पर्यावरणीय आणि वैधानिक परवानग्यांची प्रक्रिया सुरू असून, डिसेंबर २०२४ पर्यंत वित्तीय परिनिश्चिती पूर्ण होईल.
सौरऊर्जा निर्मिती प्रकल्पासाठी ६.५ मेगावॅट वीजनिर्मिती क्षमता असेल, आणि हा प्रकल्प ८.५ हेक्टर पाण्यावर 'फ़्लोटिंग सोलर' तंत्रज्ञानावर आधारित असेल. प्रकल्पाचे बांधकाम 'बांधा, वापरा आणि हस्तांतरीत करा' या तत्वावर असेल, आणि त्याचे २५ वर्षांचे देखभाल-रखरखावाचे काम सेवा पुरवठादार कंपनीकडे असेल.
Comments