28 November 2024
मुंबई, महाराष्ट्र पोलीस विभागाने रस्ते अपघातांमध्ये होणाऱ्या मृत्यू आणि जखमींच्या घटनांवर नियंत्रण ठेवण्यासाठी मोटार वाहन कायदा १९८८ च्या कलम १२९ नुसार हेल्मेट वापरण्याच्या नियमांची सक्तीने अंमलबजावणी करण्याचे आदेश जारी केले आहेत. हे आदेश राज्यातील सर्व पोलीस आयुक्त आणि जिल्हा पोलीस अधीक्षकांना देण्यात आले आहेत. हेल्मेट न वापरणाऱ्यांविरोधात कठोर कारवाई करण्याचे निर्देश देण्यात आले असून, राज्यातील सर्व प्रमुख शहरांमध्ये आणि जिल्ह्यांमध्ये अंमलबजावणी करण्यात येणार आहे.
आदेशाचा कार्यक्षेत्र
या आदेशाची अंमलबजावणी राज्यातील प्रमुख पोलीस आयुक्तालये आणि जिल्ह्यांमध्ये होणार आहे. यामध्ये खालील जिल्हे व शहरे समाविष्ट आहेत:
• शहर पोलीस आयुक्तालये: मुंबई, पुणे, नागपूर, ठाणे, नवी मुंबई, सोलापूर, अमरावती, पिंपरी-चिंचवड.
• जिल्हा पोलीस अधीक्षक कार्यक्षेत्र: अकोला, अमरावती (ग्रामीण), बुलडाणा, यवतमाळ, वाशिम, चंद्रपूर, गडचिरोली, गोंदिया, भंडारा, नागपूर (ग्रामीण), वर्धा, धुळे, नंदुरबार, नाशिक (ग्रामीण), जळगाव, औरंगाबाद (ग्रामीण), बीड, परभणी, हिंगोली, नांदेड, लातूर, उस्मानाबाद, सातारा, सांगली, कोल्हापूर, सिंधुदुर्ग, रत्नागिरी, रायगड, पालघर.
महत्त्वाचे मुद्दे:
• हेल्मेट न वापरणाऱ्यांवर कारवाई:
• दुचाकी चालवणारे वाहनचालक आणि सहप्रवाशी या दोघांनीही हेल्मेट घालणे बंधनकारक आहे.
• हेल्मेट न वापरणाऱ्या वाहनचालकांवर आणि सहप्रवाशांवर मोटार वाहन कायदा १२९/१९४ (ड) अंतर्गत दंड आणि कायदेशीर कारवाई केली जाईल.
• रस्ते अपघातांच्या माहितीचे विश्लेषण:
• राज्यभरातील अपघातांच्या घटनांमध्ये हेल्मेट न वापरण्यामुळे होणारे मृत्यू व जखमींचे प्रमाण नोंदवले गेले आहे. पोलिसांनी अपघातांमध्ये हेल्मेट नसल्यामुळे झालेल्या गंभीर परिणामांची माहिती संकलित करण्याचे निर्देश दिले आहेत.
• जागरूकता मोहिम:
• नागरिकांमध्ये हेल्मेट वापरण्याचे महत्त्व अधोरेखित करण्यासाठी पोलिसांनी जनजागृती मोहिमा राबवाव्यात.
• कायदेशीर कारवाई:
• दुचाकी चालवताना किंवा सहप्रवासी म्हणून हेल्मेट न घालणाऱ्यांवर कठोर कारवाई होईल.
पोलीस विभागाचे नागरिकांना आवाहन:
महाराष्ट्र पोलीसांनी नागरिकांना हेल्मेट वापरण्याचे आवाहन केले आहे. “हेल्मेट ही केवळ कायदेशीर आवश्यकता नसून, ती जीवन रक्षणासाठी आवश्यक आहे,” असे प्रशासनाने नमूद केले आहे. हेल्मेटचा वापर केल्यास अपघातांमध्ये होणाऱ्या मृत्यू आणि जखमींच्या प्रमाणात मोठी घट होईल, असा विश्वास व्यक्त करण्यात आला आहे.