सोलापूर, दि. १३ ऑगस्ट: राष्ट्रवादी काँग्रेसच्या कार्याध्यक्षा आणि खासदार सुप्रिया सुळे यांनी सरकारवर कडक आरोप करताना, आरक्षणाच्या मुद्द्यावर आपली भूमिका स्पष्ट केली आहे. त्यांनी म्हटले की, "आम्ही पारदर्शकपणे काम केले आहे आणि मराठा, मुस्लिम, धनगर, लिंगायत, भटक्या विमुक्तांच्या आरक्षणाच्या बाबतीत आमची सहकार्याची तयारी आहे."
सुळे यांनी नमूद केले की, "सरकार आणि त्यांचे मंत्री यांच्यात आरक्षणाच्या मुद्द्यावर एकवाक्यता दिसत नाही. सरकार एक सांगतंय तर त्यांचे मंत्री बाहेर वेगवेगळ्या मंचावरून विपरीत भूमिका घेत आहेत. त्यामुळे या प्रश्नावर एकमत नसल्याने परिस्थिती चिघळत चालली आहे. मराठा, लिंगायत, आणि भटके विमुक्त समाजाचे नेते वेगळे बोलत आहेत, ज्यामुळे महाराष्ट्रात वाढलेल्या कटूतेला सर्वस्वी सरकार जबाबदार आहे."
सुळे यांनी मराठा आरक्षणाच्या मुद्द्यावर सरकारला जबाबदार धरत म्हटले की, "मुख्यमंत्री आणि त्यांच्या मंत्र्यांनी मराठा आंदोलकांसोबत चर्चा केली आहे, आणि काही आश्वासनेही दिली गेली आहेत. त्यामुळे आरक्षणाचा प्रश्न सोडवण्याची जबाबदारी सरकारची आहे."
त्यांनी पुढे म्हटले की, "राज्य आणि केंद्रात तुमचेच सरकार आहे. मराठा समाजाला आरक्षण देण्यासाठी ५० टक्क्यांपेक्षा जास्त आरक्षण देण्याचा अधिकार केंद्र सरकारला आहे. राज्य सरकारने या बाबतीत केंद्राकडे आग्रही भूमिका मांडावी, आणि आम्ही त्याला पूर्ण पाठिंबा देऊ."
सुळे यांनी सरकारच्या इन्कम टॅक्स आणि ईडीच्या नोटिसांवरून देखील टीका केली. "आम्ही दडपशाही केलेली नाही, विरोधात बोललो म्हणून इन्कम टॅक्स नोटीस काढलेली नाही," असे सांगताना त्यांनी सरकारवर गलिच्छ राजकारणाचा आरोप केला. "महाराष्ट्रात महागाई, रोजगार, आणि भ्रष्टाचार प्रचंड प्रमाणात वाढला आहे, आणि हे सरकार आल्यापासून गलिच्छ राजकारण सुरू आहे," असे त्यांनी म्हटले.
सुप्रिया सुळे यांनी महाराष्ट्र सरकारवर कडक भाषेत टीका करताना, आरक्षणाच्या मुद्द्यावर ठोस पाऊल उचलण्यासाठी सरकारने गंभीर विचार करण्याची गरज असल्याचे नमूद केले.
Comments