23 February 2025
मुंबई, राज्य विधिमंडळाचे अर्थसंकल्पीय अधिवेशन सोमवार, 3 मार्च 2025 पासून मुंबईत सुरू होणार असून, हे अधिवेशन बुधवार, 26 मार्च 2025 पर्यंत चालणार आहे. राज्याचा अर्थसंकल्प 10 मार्च रोजी विधिमंडळाच्या दोन्ही सभागृहात सादर केला जाणार आहे.
विधानभवन मुंबई येथे रविवारी विधानसभा आणि विधानपरिषद कामकाज सल्लागार समितीची बैठक पार पडली. यामध्ये अधिवेशनाच्या कामकाजावर सविस्तर चर्चा करण्यात आली.
या बैठकीस विधानपरिषदेचे सभापती प्रा. राम शिंदे, विधानसभा अध्यक्ष ॲड. राहुल नार्वेकर, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, संसदीय कार्य मंत्री चंद्रकांत पाटील, मंत्री राधाकृष्ण विखे पाटील, गिरीष महाजन, शंभुराज देसाई आणि आमदार प्रसाद लाड, प्रवीण दरेकर, ॲड. अनिल परब, हेमंत पाटील, श्रीकांत भारतीय, छगन भुजबळ, जितेंद्र आव्हाड, डॉ. नितीन राऊत, रणधीर सावरकर, अमिन पटेल तसेच विधिमंडळ सचिव जितेंद्र भोळे आणि विलास आठवले उपस्थित होते. विधानपरिषदेच्या उपसभापती डॉ. नीलम गोऱ्हे या दूरदृष्य प्रणालीद्वारे बैठकीत सहभागी झाल्या.
अधिवेशनादरम्यान शनिवार, 8 मार्च 2025 रोजी सार्वजनिक सुटी असूनही विधिमंडळाचे कामकाज सुरू राहणार आहे. तसेच, 13 मार्च 2025 रोजी होळी निमित्त विधिमंडळाच्या कामकाजाला सुटी जाहीर करण्यात आली आहे.
राज्याच्या अर्थसंकल्पीय अधिवेशनाकडून महत्त्वपूर्ण निर्णय अपेक्षित असून, विविध मुद्द्यांवर सत्ताधारी आणि विरोधक यांच्यात जोरदार चर्चा होण्याची शक्यता आहे.