मुंबईचा जीडीपी दुप्पट करण्यासाठी निती आयोगाचा अहवाल मुख्यमंत्री एकनाथ शिंदे यांना सादर

मुंबई, दि. २२: मुंबई महानगर आणि परिसराचे जागतिक आर्थिक केंद्र म्हणून विकास करण्याच्या उद्देशाने निती आयोगाने तयार केलेला अहवाल आज मुख्यमंत्री एकनाथ शिंदे यांना सादर करण्यात आला. या अहवालानुसार, आगामी पाच वर्षांत मुंबई महानगर प्रदेशाचा (एमएमआर) सकल देशांतर्गत उत्पादन (जीडीपी) दुप्पट करण्याचे उद्दिष्ट ठेवण्यात आले आहे.

मुख्यमंत्री श्री. शिंदे यांनी या बैठकीत सांगितले की, राज्याच्या विकासासाठी दळणवळण आणि संपर्कांच्या पायाभूत सुविधांवर लक्ष केंद्रित करणे अत्यावश्यक आहे. तसेच, मुंबईच्या एकूण विकासासाठी सात प्रमुख क्षेत्रांवर काम करण्याची आवश्यकता आहे.

या अहवालानुसार, सध्या मुंबई महानगर परिसराचे जीडीपी सुमारे १२ लाख कोटी आहे, आणि २०३० पर्यंत हे २६ लाख कोटी रुपयांपर्यंत नेण्याचे उद्दिष्ट आहे. या क्षेत्रात सध्या सुमारे १ कोटी रोजगार उपलब्ध असून, पुढील काही वर्षांत आणखी ३० लाख रोजगार निर्माण करण्याचे ध्येय ठेवले आहे.

मुख्यमंत्री शिंदे यांनी सांगितले की, परवडणाऱ्या घरांची उभारणी, रोजगार निर्मिती, डेटा सेंटरला प्राधान्य, आणि अलिबाग मल्टीमोडल कॉरिडॉरच्या उभारणीला गती देणे हे राज्याच्या विकासासाठी महत्त्वाचे आहेत.

यावेळी उपमुख्यमंत्री देवेंद्र फडणवीस, उपमुख्यमंत्री अजित पवार, निती आयोगाचे मुख्य कार्यकारी अधिकारी बी. व्ही. आर. सुब्रमण्यम, आणि इतर वरिष्ठ अधिकारी उपस्थित होते.