मुंबई, दि. 12 : मुख्यमंत्री एकनाथ शिंदे यांनी सांगितले की, मुंबईचे जागतिक आर्थिक केंद्र बनण्याचे स्वप्न आता साकार होत आहे. वर्ल्ड इकॉनॉमिक फोरम (WEF) आणि मुंबई महानगर प्रदेश विकास प्राधिकरण (MMRDA) यांच्यात झालेल्या सामंजस्य करारामुळे मुंबईच्या विकासाला मोठी चालना मिळणार आहे.
या सामंजस्य करारावर एमएमआरडीएचे महानगर आयुक्त विक्रमकुमार आणि वर्ल्ड इकॉनॉमिक फोरमचे अध्यक्ष प्रा. क्लॉस श्वाब यांनी स्वाक्षऱ्या केल्या. या करारामुळे मुंबईची अर्थव्यवस्था दुप्पट होण्याचा अंदाज आहे.
मुख्यमंत्री शिंदे यांनी नमूद केले की, मुंबईचा जीडीपी 2030 पर्यंत 300 अब्ज डॉलर्सपर्यंत आणि 2047 पर्यंत 1.5 ट्रिलियन डॉलर्सपर्यंत पोहोचवण्याचे उद्दिष्ट आहे. याचबरोबर, 25-28 लाख नवीन रोजगाराच्या संधी निर्माण होतील, ज्यात महिलांचा सहभाग वाढवण्यावर भर दिला जाईल.
याच वेळी, उपमुख्यमंत्री देवेंद्र फडणवीस यांनी सांगितले की, या सामंजस्य करारामुळे मुंबईतील लोकांचे जीवनमान सुधारेल. या प्रकल्पांतर्गत मोठ्या प्रमाणात पायाभूत सुविधा निर्माण केल्या जातील, ज्यामुळे मुंबई आंतरराष्ट्रीय स्तरावर आर्थिक केंद्र म्हणून ओळखले जाईल.
प्रा. श्वाब यांनी मुंबईच्या या विकासाच्या प्रकल्पाचे कौतुक केले आणि म्हटले की, या प्रयत्नांमुळे मुंबई जगातील सात प्रमुख महानगरांमध्ये स्थान मिळवेल.