सिद्धार्थ खरात शिवसेना (ठाकरे) गटात सामील, मेहकरमधून निवडणूक लढण्याची शक्यता

मुंबई: राज्यातील प्रशासनात तीन दशके काम करून गृह विभागातील सहसचिव पदावर कार्यरत असलेले सिद्धार्थ खरात यांनी स्वेच्छानिवृत्ती घेतल्यानंतर शिवसेना (ठाकरे) गटात प्रवेश केला आहे. मंगळवारी मातोश्री येथे झालेल्या एका समारंभात शिवसेना प्रमुख उद्धव ठाकरे यांनी खरात यांच्या हातात शिवबंधन बांधून त्यांचे पक्षात स्वागत केले. या प्रसंगी खासदार अरविंद सावंत, माजी खासदार विनायक राऊत, बुलढाणा जिल्ह्यातील शिवसेना नेते प्रा. नरेंद्र खेडेकर आणि जिल्ह्यातील शेकडो शिवसैनिक उपस्थित होते.

खरात हे बुलढाणा जिल्ह्यातील सिंदखेड राजा तालुक्याचे रहिवासी आहेत. त्यांनी राज्यातील उच्च व तंत्र शिक्षण विभाग, ग्राम विकास विभाग, गृह विभाग अशा विविध विभागांमध्ये सहसचिव म्हणून काम केले आहे. त्यांच्याकडे अनेक राज्यमंत्री, कॅबिनेट मंत्री, आणि केंद्रीय राज्य मंत्र्यांचे खाजगी सचिव म्हणून काम करण्याचा अनुभव आहे.

आगामी विधानसभा निवडणुकीत मेहकर मतदारसंघातून सिद्धार्थ खरात यांना शिवसेना (ठाकरे) गटाकडून उमेदवारी दिली जाण्याची शक्यता आहे. मेहकर हा मतदारसंघ अनुसूचित जातीसाठी राखीव असून मागील ३० वर्षांपासून प्रतापराव जाधव यांच्या नेतृत्वाखाली आहे. खरात यांच्या पक्ष प्रवेशामुळे या मतदारसंघातील विकास कामांना चालना मिळेल, असे मानले जात आहे. त्यांच्या अनुभवामुळे शेतकरी, शेतमजूर, आणि बेरोजगारांच्या समस्यांचे निराकरण होण्यास मदत होईल, अशी अपेक्षा व्यक्त करण्यात येत आहे.

खरात यांनी आपल्या नोकरीच्या कालावधीत बुलढाणा जिल्ह्यातील विविध सामाजिक, सांस्कृतिक, आणि रोजगारविषयक उपक्रम राबविले आहेत. त्यांनी दुग्ध व्यवसायाच्या विकासासाठी दुधाळ गायींचे वाटप आणि दुध संकलन केंद्रे उभारण्याचे कार्य केले आहे. तसेच, थोर महापुरुषांच्या जयंत्या, राष्ट्रमाता जिजाऊ यांच्या जन्मदिनी मोफत खिचडी वाटप, आणि बेरोजगार युवकांना मार्गदर्शन करण्याचे कार्य केले आहे. त्यांच्या या कार्यकर्तृत्वामुळे बुलढाणा जिल्ह्यातील सामाजिक आणि राजकीय समीकरणे बदलण्याची शक्यता वर्तवली जात आहे.